Үүт былаанын сыл аҥаарынан толордулар

28.06.2019 

 

Ааспыт сылга, уустук туруктаах хаһаайыстыбаҕа «Нөмүгү» агрофирмаҕа, генеральнай дириэктэринэн Нөмүгүлэр бэйэлэрин уоллара А.В. Михайлов  сэтинньи 11 күнүгэр анаммыта. Аҥаардас сүөһүтүн аһа сөптөөҕүн бэлэмнэммит буолан быйылгы кыстыгы этэҥҥэ туораабыттара. Онтон бүгүн, “Хараанай” сайылыгын ыанньыксыттара үүт ыамыгар сыллааҕы былааннарын сыл аҥаарынан толороннор, хамнастарын үгүөрүтүк аахсаннар бэрт көхтөөхтүк үлэлии-хамсыы сылдьаллар. Сыллааҕы былааны сыл аҥаарынан толорбут хаһаайыстыба Сахабыт сиригэр баар да буоллаҕына бэрт аҕыйах баара буолуо.  Олох барахсан икки өрүттээх буоллаҕа, биир өттүнэн үүт үрүлүччү ыана турар, иккис өттүнэн былааны таһынан ыаммыт үүккэ үбүлээһинэ суох, дьэ хайдах буолаллар, салгыы хайдах кыстыгы көрсөллөр?!

Бу балаһыаньаны билсэ, Хараанай сайылыгар баран генеральнай дириэктэри Андрей Михайловы сирэй көрүстүм:

- Быйылгы үүт туттарыытыгар хантараак түһэрсэрбитигэр былааммытын былырыыҥҥы кээмэйинэн 340 тн. биэрбиттэрэ. Бу былааммытын номнуо бэс ыйын түмүгүнэн толрдубут. Мантан салгыы  үүккэ эбии ирээт көстүбэтэҕинэ, үүппүтүн ханна гынарбыт биллибэт уустук балаһыанньата үөскүүр кутталлаах.  Тыа хаһаайыстыбатын министиэристибэтин көмөтүнэн эбии ирээт көрдөхтөрүнэ, былааммыт курдук быйыл олус үчүгэй түмүктэри ситиһиэ этибит. Маннык туруктаах өрөспүүбүлүкэ үрдүнэн биһиги эрэ буолбатахпыт буолуо. Онон өрөспүүбүлүкэ таһымыгар быһааран, үүккэ эбии ирээти былааннарын аһары толорбут хаһаайыстыбаларга сотору кэминэн көрөр хайаан да наадалаах, - диэн хас да төгүллээн чопчулаан санаатын эттэ Андрей Викторович.

Салгыы, ыанньыксыттарга билэрдии, орто оскуоланы үөрэнэн бүтэриэҕиттэн сүөһүнү көрүүгэ илиитин араарбакка үлэлии сылдьар, дьон-сэргэ холобур оҥостор киһитэ, “Гражданскай килбиэн” түөскэ кэтиллэр бэлиэ хаһаайына, ынах ыаһыныгар Сахабыт сирин үс төгүллээх абсолютнай чөмпүйүөнэ, Арассыыйа ыанньыксыттарын күрэҕэр туйгун көрдөрүүлээх Александр Громовы көрсөн сайылык туһунан сонуммутун үллэстэбит, үлэтин-хамнаһын туоһулаһабын:

 - Сайылыкпыт барахсан биһиэхэ сүөһүнү иитэр дьоҥҥо саамай кэтэһиилээх, күүтэр сирбит буоллаҕа дии. Этэргэ диэри, биһиги даҕаны уонна уһун кыһыны быһа бааллан турбут ынахтарбыт даҕаны сынньанабыт. Манна сибиэһэй салгына үчүгэйэ, өлгөм үүнүүлээх мэччирэҥэ олус буоллаҕа дии. Ынахтарбыт мэччийэн үүттэрэ эбиллэр, аны кэлэр кыстыкка киириигэ дылы кыахтарын ылаллар. Сайылыкпытыгар 160 ыанар ынахтаахпыт, билигин үүппүт үчүгэй, күҥҥэ икки аҥаар туоннаны ыы сылдьабыт. Бу сайылыкпытыгар түөрт ыанньыксыт мин, Людмила  Сивцева, Анисия, Сергей  Павловтар  буолан үлэлии сылдьабыт. Мария Саввина учуотчугунан үлэлиир уонна биир Егор Данилов диэн солбукка сылдьар ыанньыксыттаахпыт. Кини барыбытын уочаратынан биирдии нэдиэлэ солбуйар. Үүппүтүн Мохсоҕоллоохтооҕу «Хаҥалас-Ас»  тыа хаһаайыстыбатын производственнай кээпэрэтиибигэр уонна Дьокуускайдааҕы үүт собуотугар илдьэллэр, -диир Александр Николаевич.

Үүт ыама үрдүүрүгэр бостууктар сүҥкэн оруоллаахтар. Кинилэр ыам бүтэрин кытта кэтэһэн туран, ынахтарын мэччирэҥнээх, уулаах сирдэринэн үүрэн батыһа сылдьан көрөллөр, болдьоммут чаастарыгар туох да эккирэтиһиитэ суох наҕыллык хаамтаран аҕалаллар эбит. Онон, тото-хана мэччийэн, уулаан, уһаты-туора хаампат буоланнар, ынахтар үүттэрэ биллэ эбиллэр.

Этэргэ диэри араас дьэрэкээн сибэккилэрдээх, намчы оттоох, чыыбаайылаах Хараанай сайылык ыанньыксыттара үрүлүйэ сүүрэр үрүҥ илгэни үүтү-сүөгэйи, ыыс араҕас арыыны, быс да сыа эмис эти ылаллар, ылыахтара да турдаҕа. Ол барыта тулалыыр айылҕабыт быйаҥыттан, ону сэргэ үлүмнэһэн үлэлиир дьон көмүс көлөһүннэрэ сөптөөхтүк сыаналаннаҕына, үп-харчы кыһалҕата, үүккэ эбии ирээттэһин ыйытыга кэмигэр быһаарыллан истэҕинэ оҥоһуллуо буоллаҕа.

Уйбаан УЙГУУРАП,

хаартыскаҕа: Хараанай сайылык туруу үлэһиттэрэ уонна дириэктэр Андрей Михайлов күнүскү ыамҥа титииккэ баран иһэллэр.


Возврат к списку

Корзина 0 позиций
на сумму 0 руб.