Войти Регистрация
Корзина 0 позиций
на сумму 0 руб.

Дьааҥыга Күүлэй курэҕэр 80-ча туонна от оттонно

09.08.2019 

Атырдьах ыйын 7-8 күннэригэр «Полюс Холода» кооператив Остуолба нэһилиэгэр  Улахан Сыһыы ходуһаҕа «Күүлэй-I»  күрэҕин тэрийэн ыытта. Барыта 10 хамаанда, 70-ча киһи күрэхтэстэ. Хамаанда 5 киһиттэн турар (3 эр киһи, 2 дьахтар). Быйылгы Күүлэйгэ тэрилтэ салайааччылара, нэһилиэк баһылыктара хамаанда тэринэн кэлбиттэр. Ол курдук Үөртээх нэһилиэгин баһылыга Виктория Слепцова, Боруулаахтан баһылык Евгений Слепцов, Баатаҕайтан ФКУ-лар, Киин бухгалтерия коллектива, Верхоянскай куорат хамаандата. Онтон олохтоохтор 4 хамаанданы туруорбуттар.

Икки күн устата ходуһаҕа хотуур тыаһа биир кэм ньиргийэн олорор, кыраабыллар  үөһээ-аллараа түһүү. Дьэ, онтон түмүк маннык буолла: 6,34 га сири охсон, харбаан кыайыылааҕынан Дьулустаан Горохов хамандыырдаах Остуолба хамаандата  буолла уонна 80 тыһ. солк. наҕараадаланна. II-с миэстэҕэ 5 гаттан ордук көрдөлүүлээх Николай Горохов салайааччылаах Боруулаах хамаандата таҕыста уонна 40 тыһ. солк. ылла.  III-үс миэстэҕэ 6 туоннаттан тахсаны оттообут Денис Сотрудников салайааччылаах Остуолба хамаандата тигистэ уонна 30 тыһ. солк. наҕараадаланна.

Биирдиилээн күрэххэ, былыргы илии хотуурунан охсууга - 1,34 га сири охсон - Дмитрий Гуляев 2019 сыллаах төрүөх ньирэйинэн наҕараадаланна. Онтон аныгы бензокосанан охсууга кыайыылааҕынан Алексей Семенов буолла уонна 5 тыһ. солк. ылла.

Харчынан бириистэри уонна бэлэҕи  «Полюс Холода» кооператив туруорда. Күүлэй кэмигэр уопсайа 45 га сир охсуллубут. От үүнүүтэ үчүгэй, хойуу буолан, быһа холоон, 80 туонна от кэбиһиллиэҕэ дииллэр.

«Полюс Холода» кооператив сылын ахсын маннык Күүлэй күрэҕин сайын устата 3-тэ ыытар. Кооператив иһинэн тэриллибит „Алгыс“ хаһаайыстыбаҕа былырыын 224 төбө кыстыкка киирбитэ, ол иһиттэн ыанар ынаҕа 100. Сыл тахсарга 350 туонна от наада. Дьэ, бу оту булунарга  кооператив үс Күүлэйи тэрийэр. Маны таһынан, чааһынай дьонтон от атыылаһар. Быйыл Үөһээ Дьааҥы улууһугар ордук ыарахан сайын буолла. Курааннаан от чугас сирдэргэ үүммэтэ. Билигин кооператив 1 туонна оту 10 тыһ. солк. атыылаһабын диэн биллэрэн турар. Дьон атыыга диэн оттуу сылдьар.

«Бастакы Күүлэйбит сүрдээх үчүгэйдик ааста. Кыттааччылары икки күн устата аһынан-үөлүнэн толору хааччыйдыбыт. Минньигэс, итии астаах асчыттарбар Валентина Слепцоваҕа, Дарья Стручковаҕа махтанабын. Ферма сэбиэдиссэйэ Татьяна Михайлова дьону көҕүлээн үгүс кыттааччы кэллэ. Кэлбит дьон бары астынан-дуоһуйан барбытыттан ордук үөрэбит. Аны өссө 2-3 Күүлэйдэрбитин ыытыахпыт. Маннык тэриннэхпитинэ эрэ кыстыыр оппутун булабыт. Быйыл от үүммэккэ, ыраах сирдэргэ оттуу барабыт», - диэн санаатын үллэстэр кооператив дириэктэрэ Екатерина Портнягина.

Түгэнинэн туһанан, Күүлэйи тэрийэргэ, кыттааччылары көҕүлүүргэ көмөлөспүт уонна миэстэҕэ тиксибэтэх хамаандаларга бириистэри туруорбут улуустааҕы тыа хаһаайыстыбатын управлениетыгар кооператив аатыттан махталларын тиэрдэллэр.


Возврат к списку

Войти Регистрация
Корзина 0 позиций
на сумму 0 руб.