Хоһуун үлэһит Семен Варфоломеев

10.06.2019 

 

Кэрэ айылҕатынан, туруу үлэһит дьонунан ырыаҕа ылламмыт, хоһооҥҥо хоһуйуллубут Тойон Арыыга сайынын аан-бастаан сырыттым. Булгунньахтаахтан  сыыдам көлөлөөх Алексей Алексеевтыын  мотуорунан уу көмүс таммахтарын  күн уотугар ыспахтаан сыыйылыннаран тиийдибит. Күөрэгэй чыычаах дьурулата туойар, кэрии тыаҕа кэҕэ этэр сайыммыт ситэр-тупсар кэмигэр, уйгу-быйаҥ дойдутугар  хоһуун сэмэй үлэһити Семен Варфоломеевы көрсөөрү анаан-минээн бара сырыттым. Төрөппүттэрэ ураты талааннаах бүгүрү үлэһит дьон, күн күбэй ийэтэ Вера Семеновна Варфоломеева – Айталыына норуот маастара,  иистэнньэҥ, субу аҕай Дьокуускай куоракка быыстапкатын туруоран арыйан кэлбит. Аҕалаатар аҕата Валерий Дмитриевич Варфоломеев  Тойон-Арыы «Дьобулҕа» култуура Киинин мэтэдьииһэ, дьаамсыктартан сыдьааннаах, бу хайысхаҕа улахан өрүттээх үлэни ыытыһар, өбүгэлэрин үгэстэрин үйэтитэр.

Семен Варфоломеев икки сыллааҕыттан ыла бааһынай хаһаайыстыбаны тэринэн 40 төбө сүөһүгэ анаан сырдык, сылаас, кураанах хотону бэйэтин кыаҕынан туттан, сүөһү иитиитигэр ылсан үлэлиир. Күөххэ үктэммит ынах сүөһүлэрэ мэччирэҥҥэ, ньирэйдэрэ далга аһыы сылдьаллар. Далга, кыбыыга курулаппыт отторо сааһыламмыттар.

- Бу ааспыт кыстыкка 40 төбө хороҕор муостааҕы кыстаттыбыт, ол иһигэр ыанар ынахпыт 12 этэ, аны күһүн 17 хас буолара буолуо.  Быйыл эбиллии баар, былырыыҥҥытааҕар быйылгы кыстык этэҥҥэ ааста, оппут аһылыкпыт тиийдэ, өссө орто. Ынахтарбыттан биэс төрөөбөтө, оҕус суох буолан. Итинник кыһалҕа манна Тойон Арыыга сытыытык турар. Ол иһин аҕам Иркутскай уобаласка баар фермер табаарыстарыттан симментал боруода  икки ньирэйи аҕалтарбыта атыыр оҕус гынаары, ону иитэ сылдьабыт. Ньирэйдэри кытта биэс сибиинньэ оҕото ыыппыттара.  Бу хаһаайыстыбабар сүрүн тирэхтэрим төрөппүттэрим Валерий Дмитриевич, ийэм Вера Семеновна уонна Надя улаханнык көмөлөһөллөр. Ыабыт үүппүтүн сарсыарда киэһэ үүт тутар пууҥҥа илдьэбит, билигин үүппүт 70 кг буолла. Ону манна арыылааннар Мохсоҕоллоохтооҕу «Хаҥалас-Ас»  тыа хаһаайыстыбатын производственнай кээпэрэтиибигэр туттараллар. Сааскы халаан уута сылын аайы ыксатар. Ол иһин урукку сопхуос хотонун оннугар үрдүк сири күрүөлээбиппит, уу кэлэр түгэнигэр сүөһүлэрбитин чугастыы онно таһаарарга суоттанабыт,-диир чопчу былааннаах сыаллаах хоһуун үлэһит Семен Варфоломеев.

Бааһынай хаһаайыстыба салайааччыта Семен Валерьевич кэргэнинээн Долгуйаана Дмитриевналыын (Булгунньахтааҕы оҕо мусукаалынай оскуолатын завуһа) үс оҕолоохтор. Улаханнара кыыстара Ангелина туйгун үөрэнээччи , уоллара Тамерлан иккис кылааһы үчүгэй сыаналарынан бүтэрдилэр, кыралара кыыс оҕо үс ыйдаах, дьиэ киһитэ.

 Айылҕа маанылаан анаабыт кэрэ сиригэр, төрүт дойдуларыгар Тойон Арыыга үлэ-хамнас өрө тутуллар. Манна эдэр дьон олохсуйаллар,  аныгылыы тупсаҕай быһыылаах саҥа дьиэлэри тутталлар. Бары хороҕор муостааҕы, сыспай сиэллээҕи ииттэллэр. Дойдуларын Тойон Арыыны олус таптыылларын бэлиэтии көрдүм.

 Дьоллоох-соргулаах үтүө дойду төрүт  олохтоохторо Вафоломеевтар туруу үлэһит дьон, сайыҥҥы күөх быйаҥтан сомсон хаалыҥ, үрүҥ илгэни үрүлүтүҥ,  сайда-үүнэ туруҥ!, диэн баҕа санаабын тиэрдэбин.

Уйбаан УЙГУУРАП, Хаҥалас улууһа.


Возврат к списку

Корзина 0 позиций
на сумму 0 руб.